fbpx
主頁, 動漫資訊, 潮玩新聞 — 21/06/2012 at 2:00 pm

《春秋戰雄》誤把「淝水」當「泓水」?

by

《春秋戰雄》第126期封面,神月索爆勝公子亦英爆,內文故事亦同書名〈天音冷戰 愛恨糾纏〉好夾,講神月受鳳后脅逼,侷住同愛郎勝公子大打出手,最後勝公子一招「聖輪破甲」大破神月「神音天劍」,得手之際卻心軟硬生生收招,俾鳳后一招鳳凰玄火劍偷襲成功。癡男怨女打又唔係,唔打又唔係,都唔知點收科。

雖然角色人物亂到飛天,但唔知點解我幾Like呢本書,因為去橋著實好快,唔會拖泥帶水。愛之深,自然責之切,偏偏我又有鋪每本公仔書必重頭徹尾睇兩次嘅習慣,第一次望到第廿七頁第五格,個心已經覺得怪怪哋,文字說明話「春秋時期,宋襄公稱霸中原,但楚莊王不服,兩國壁疊分明,日後更發生了震撼古今的淝水之戰,成為史上第一場大型戰役」,淝水之戰?但又講唔出怪喺邊;睇第二次,我知問題出現喺邊嘞,淝水之戰唔係發生喺東晉時期嘅咩?中學讀歷史有教過喎,連忙翻查腦細胞資料,可惜唔夠Ram,唔忿氣,上網一查,噢,我無記錯原來係《春秋戰雄》搞錯,史實係東晉謝玄、謝琰用七萬兵戰勝前秦苻堅十五萬大軍,決戰地點就係淝水,呢一戰影響深遠,奠定中國南北分立局面。

點解出錯?估計係編者一時鬼揞眼,誤把「泓水」當「淝水」,史實係春秋時期宋楚交戰於泓水,宋國大司馬公孫固,勸宋襄公趁敵人未完全過河快打落水狗,點知宋襄公懶有型,話敵人未準備好就開打,有失堂堂一國之君身份,結果瀨嘢收場,俾楚軍打到潰不成軍,宋襄公自己都身受重傷,第二年仲釘Q埋。都係嗰句,橋段情節可以天馬行空,你畫到明鬼變女人都得,但史實卻絕對錯不得。

《春秋戰雄》第126期$15

 

就係有兩支旗嗰格,文字說明出錯嘞。