fbpx
主頁, 動漫資訊, 潮玩新聞 — 13/12/2013 at 8:00 pm

一漫年俾文化傳信收購,RIP!

by

1499428_654295137953934_1539909904_n
睇埋《四大名捕》裡面嘅「杜比專欄」先知,原來因為一漫年執笠,一向有「爛尾之王」之稱嘅司徒劍僑先迫不得已摺書,今次唔關佢事,要怪,就怪港漫始終不景氣,又令一間滿有熱誠嘅漫畫公司收檔。

屈指一算,原來我都不經不覺撐咗一漫年六年,家陣來個小總結──《九龍城寨》算唔錯,係由《九龍城寨》過渡到《九龍城寨II》個轉折位差啲,大老闆同陳洛軍無厘頭化干戈為玉帛,呢條橋真係好突兀,而《九龍城寨II》以陳洛軍同藍男擺喜酒作結,亦一樣令人摸不著頭腦,忌廉哥同十二少明明打生打死,去到尾又係講兩句收工,大有埋唔到尾之感。

至於《幻城》,故事架構好,原本幾睇好,點知市場唔受,侷住摺書無計,我都覺得有啲可惜;《拳道》就得啖笑,然後睇到我呱呱叫,李小龍戰黃飛鴻,一出呢對名字,我心底已經暗叫不妙:「大佬,究竟相點呀?」果然不出所料,好快又拜拜;《龍抬頭》就雷聲大雨點小,開個局唔差,但睇多兩期就發覺係舊瓶舊酒,人物性格唔鮮明,有少少唔知為乜而打。而最好睇嘅,始終係《四大名捕》同《溫瑞安群俠傳》,到依家我仲記得王小石點樣隊關七一刀、李沉舟出翻天三十六‧奇、雷損之死、柳五暗戀趙師容、燕狂徒誓要關七拜自己為師、白愁飛點樣犠牲溫柔、狄飛驚嘅大棄子擒拿手等等,點解仲記得呀?因為好睇囉。

講到好睇,杜比臨別在即嘅一段肺腑之言一樣好睇,現節錄「杜比專欄」一段:「我們絕對不想,哪間漫畫公司不希望自己的漫畫能出版到100期……倒閉、結業、破產、收場,比比皆是,原來壓力可以那麼大……此時我已經在盤算一漫年出版如何走下去……四出奔走,希望為公司脫困。機緣巧合,遇上了文化傳信集團總監陳文龍先生。正值文傳欲擴充及發展新項目和業務,經過一輪研究和了解,雙方終於達成協議――文化傳信集團正式收購一漫年出版有限公司……終於,走到這一步了……在漫畫出版行業,突然間像來到了一個驛站。千言萬語,都只能到此為止。」閱之不無欷歔,欲觀全文可上一漫年面書專頁。

最後一句,一漫年,一路好走,RIP。

資料來源:https://www.facebook.com/theonecomics