動漫資訊, 潮玩新聞 — 13/12/2013 at 8:30 am

失望!可惜!《新著四大名捕》八期收皮!

by

000

八期,估唔到《新著四大名捕》出到第八期就收皮,對於我呢個司徒劍僑迷同溫瑞安迷嚟講,雖不致誇張到痛心疾首,但真心覺得好好好好好可惜囉。

無認真翻睇溫瑞安原著小說,但印象中,作為漫畫版嘅《新著四大名捕》真係好忠於原著,就好似睇小說咁,一章又一章,一段又一段,好肯花時間鋪排單一個角色冷血出場,頭五期仲係講緊冷血點樣由一個孤兒變成高手,點樣漠視頭五個教練最後收歸諸葛正我嘅六扇門門下,點樣接受第一個考驗挑戰張十一,去到第六期開始先正式挑戰驚怖大將軍。
誰知……劇情推進剛剛去到高點,打咗兩期多啲話完就完,仲要不分勝負,呢個Ending實在太離譜嘞,慘在去到停刊,都仲未交待到冷血知道凌驚怖係自己殺父仇人,呢期仲好意思叫〈四大名捕鬥將軍〉,根本無情、鐵手同追命都未出過手,係咁意亮相講句對白就收工,畀人感覺更加落雨收柴Feel。唉,開個頭開得咁好,無端端又摺書,相信好多港漫迷都同我一樣,大呼無癮。