fbpx
主頁, 動漫資訊, 潮玩新聞 — 19/06/2012 at 2:00 pm

《石黑龍傳》新橋抵讚 專欄勝內文

by

創刊號《石黑龍傳》,普通版$15。

龍虎門三皇四小將,我最愛石黑龍,愛佢件蠍子背心,愛佢條疤痕,愛佢練嘅武功係金鐘罩,任抦任插都打不死,所以黃玉郎出咁多本新著《龍虎門》前傳我都唔追,出《石黑龍傳》我不得不乖乖掏腰包。

創刊號上個禮拜已經見街,依家先寫呢條News確係有啲遲,但一來有心唔怕遲,二來專登等出埋第二期先寫,因為創刊號淨係靚個封面,內文質素一般咗啲,尤其第十五頁打後,好多格都畫到大大格兼無實景,人物面相亦唔多討好,如果大家睇得細緻啲,就會發現金毛獅王同金龍頭保鑣魔鬼經常走樣,嘍囉到唔嘍囉,九紋龍明明有波有蘿,但又畫到勁似男人。唔係話唔合格,公仔唔係話醜,講真,睇得黃玉郎出品,一定係我呢類死忠Fans,唔會要求有邱福龍《鐵將縱橫》式俯視、低炒等高難度分鏡,但作為創刊號,咁嘅內文質素又真係求其咗少少囉。

要讚嘅反而係專欄,中間幅Old school跨頁海報叫做賣大包有嘢送咁啦;李中興嘅「黑龍發佈會」不過不失,至少文理通順知佢寫乜;鄺彬強嘅「彬彬有禮」都係類似「熱血編輯部」之類嘅大路嘢;而最最最最正嘅係「臭臭香港」,甚麼「高壓隻」、「低壓嘈」、「辣撻局」、「低智啟B大腦開發幼兒奶粉品質自我約束促進會」,食字食得風趣抵死,用羅馬鬥獸場寸曾鈺成唔記得熄咪漏口風結束立法會拉布單嘢,更加笑爆嘴;上官小強嘅「小小笑畫」就直頭係正添啦,無畫咁多年公仔,上官小強寶刀未老,壽星仔依然畫得好有味道,我都好Like。

去到第二期,個人認為有啲睇頭嘞,唔再玩白蓮教、羅剎教、元始門、通天教、廣法堂等等悶蛋教派,呢次玩神秘組織共世會,場景仲要喺番香港,一開波就講白仇翻生、特首被劫、小棍妖冒認老竇同石黑龍隻揪。熟識的人物,不一樣的故事,希望編劇李中興可以做番場好戲,將個古仔講得圓圓滿滿,千祈唔好爛尾呀。

跨頁海報,係好Old school,但我鍾意。

 

上官小強四格漫畫,依家睇都仲笑得出。

 

第二期《石黑龍傳》$15

 

笑爆嘴專欄「臭臭香港」,無署名,好想問,究竟邊個寫架?