fbpx
主頁, 動漫資訊, 潮玩新聞 — 19/06/2012 at 12:00 pm

《粗口俠》,睇到我爆粗!

by

 

《粗口俠》創刊號$15

 

只怪自己有鋪逢創刊號必買癮,明知都唔慌好嘢得去邊,但都要畀十五大元買《粗口俠》,無吹水,我真係一路睇一路爆粗,錢事小呀,浪費生命事大呀。

不認不認還須認,原來肥良喺我心目中仲係有一定地位嘅,一睇封面牌頭,大剌剌五個大字「溫日良編繪」,唔係啩?乜今時今日溫日良仲識畫公仔咩?一揭開,噢!O嘴!想點呀?唔敢用「慘不忍睹」嚟形容,但啲公仔實在……唔識點形容,Q版唔係Q版,線條簡單得只比火柴公仔好少少,總之就古古怪怪好唔順眼。都算,公仔靚唔靚都算,肥良手畫有幾靚大家心中有數,唔出「肥良影印道」已經要拜神,但個古仔真係……真係想問一句:「係唔係當讀者白痴架?」故事講雕西星球死剩種正能量,點樣靠講粗口保護地球,變身粗口俠擊退怪獸大能笨實,絕招係「鵰梨腦帽西」。出絕招嗰陣,正能量把口會吐出一隻鵰、一個梨、一個腦、一頂帽同一隻麻雀西,仲要逐樣畫埋出嚟,一味食字一味搞低能,大佬有無咁弱智呀?唔係吹水,真係睇到我火都嚟埋,好彩一期完啫。

睇晒內文,睇書尾「肥良專欄」,睇完有啲欷歔,肥良透露佢會離開香港畫壇,「做完《粗口俠》,我已計劃會做甚麼,裡面九成九,並和我熱愛的港漫沒有關連。實在心痛。但事實就是事實……」睇到佢咁寫,我都有啲心痛,何解一個有料之人會搞成咁?昔日《海虎》橋精畫勁嘅肥良究竟去咗邊?真係唔知去咗邊,但肥良自己知道自己會去邊,「……而我下一套作品,更是個在美國推出的高球故事……假設出到一本有一百萬銷量的書,我每本拿到三、五十港元回報嘅話,佢老味真係一本搞掂晒……」唔想撥佢冷水,高球!Golf喎!有幾多人識打Golf?有幾多人會睇呢個書種?不過點都好,做人唔好恨人富貴憎人窮,衷心希望肥良能夠夢想成真,闖出一片天為港人增光。So,《粗口俠》呢十五大元,就當送佢一程啦。

「粗皮四格」有錯別字,「皮」應為「鄙」,內容亦笑唔出。

呢啲公仔我都識畫啦,問你點頂先?

 

呢隻就係怪獸大能笨實,完全零造型,無心機之作。

 

呢個就係粗口俠,心口有「門」加「閃電」圖案。

絕招「鵰梨腦帽西」,問你死未?

狄奇利專欄介紹「Holland King」、「Macau Fan」之類食字粗口,好好笑咩?