主頁, 動漫資訊, 潮玩新聞 — 01/12/2013 at 12:13 pm

《殺手‧無與倫比的自由》創刊 Cult味濃郁

by

4

《殺手‧無與倫比的自由》創刊,我滿懷期待買書,睇完無失望。讀後有感,一,好Cult,好重小說味,有啲似鄭健和之前本《戰狼與瑪莉》,有驚喜!二,好快,快乜?好快睇完,畫得大格咗少少,不多不少三個地鐵站睇完,唔夠喉囉。

交代多次詳細資料先,《殺手‧無與倫比的自由》由曹志豪主編、創造館余兒監制、原著九把刀同名小說,唔玩甚麼膠呀、凹凸呀、燙金燙銀、透明卡片呀等等特別版,簡簡單單每本$15,封面由一位叫Michael嘅人兄創作,似電影海報多過似港漫封面,幾有新鮮感,我Like。「殺手是怎樣煉成的」係故事重點,Cult在第一主角蒼葉並不因為甚麼恩怨情仇、兒女私情、隱衷若衷而成為殺手,佢只係一個欠債纍纍嘅窮光蛋,連自殺嘅勇氣都無,卻因捲入一次血腥仇殺而「有運地」成為幸存者,繼而「有運地」成為全職殺手。一句講晒,靠符碌!劇透少少,蒼葉符碌成為殺手後,會由原先嘅唔多想殺人變成殺咗好多唔應該殺嘅人,即係話,蒼葉並唔似一般小說主角咁「十足正義」,相反,九把刀係想寫一個平凡人點樣變成一個變態殺手,最後越殺越瘋狂。就憑故事可觀性,加上曹志豪手畫一向唔差,確實非常值得捧場,我話嘅。