PS3, 主頁, 遊戲新聞 — 16/06/2012 at 1:27 pm

PS3免費下載 6月28日連線對戰《機動戰士高達Battle Operation》

by

由NAMCO BANDAI Games開發,於6月28日可以喺PSN下載嘅online對戰遊戲《機動戰士高達Battle Operation》,啱啱公佈各項收費情報。不過放心,下載遊戲唔駛錢,免費都有得玩,雖然暫時就只限日本PSN,但只要你有日本PSN,就可以有得玩!想買嘢,都可以出去買張點數卡,侵埋你玩!

嚟自日本遊戲網站Game Watch嘅消息,呢隻高達遊戲係免費下載嘅商城模式玩法,即係基本上你唔買配備或新MS同武器,係可以全程免費玩嘅。系統方面,以消費「出撃エネルギー」嚟加入戰場,「出撃エネルギー」每兩個鐘就會回復1點,最多累積3點喺手,唔想等要不眠不休煲機嘅,都可以100日元1點購買,一次買6點就480日元。而隨住戰鬥就會得到開發點數同設計圖,俾你改裝同開發新MS。

機體方面,唔駛錢都可以用晒大部份MS,不過改裝強化到最高level後,就要駛300日元嚟解鎖,武器同零件就要每樣200日元解鎖,即係除咗努力參戰之餘,仲要駛錢改裝出屬於自己嘅最強MS!

武器方面分為格鬥、汎用同支援3種,唔同MS會有唔同強項。另外進一步情報就係戰場有唔同地圖,而天氣亦會有所唔同,天氣會影響視野、行動速度等要素。最後,遊戲裏面支援各玩家、陳述最新戰況嘅無線通訊員都搵嚟人氣聲優配音!玩得耐聽到把靚聲,人都醒神啲,聲優陣容包括日笠陽子、本田貴子、喜山茂雄同前野智昭。

28日有得玩,不過由即日開始去定日本PSN登記,到時就會有兩部先行配備嘅MS可用,包括輕裝型吉姆(ジム・ライトアーマー)同ザクII FS。

官方網站
http://pgdp.channel.or.jp/gundam/ps3/