fbpx
主頁, 動漫資訊, 潮玩新聞 — 15/06/2012 at 12:00 pm

鄭中基扮追命?簡直攞命!

by

 

鄭中基飾演追命,簡直攞我命。

 

我承認,理論同實際上呢段都唔係一條動漫News,似娛樂八卦笑話多啲;我承認,我係先入為主,俾司徒劍橋筆下嘅漫畫版四大名捕造型洗晒腦;我承認,每個人睇完溫瑞安原著《四大名捕》小說,都會各自建構心目中嘅四大名捕容貌同形象──無情最有情、鐵手最剛猛、追命最瀟灑、冷血最熱血。所以,當我知道陳嘉上開拍《四大名捕》,搵鄭中基飾演追命嗰陣,我個心即刻打咗個突,睇埋劇照Poster,我直頭有種見暈嘅感覺,連隔日飯都想嘔埋出嚟。

唔係我偏執,身邊十個Friend有十一個都媽聲四起,喂,大佬,溫瑞安筆下嘅追命係個酒鬼,原名崔略商,外表輕鬆佻皮但絕對係個擔得起半邊天嘅真英雄。記住,係佻皮,而唔係賴皮,更加唔係無賴,一講鄭中基,我只會聯想到佢首歌《無賴》,因為佢為人確實無賴;再講鄭中基,我再次聯想起佢喺《龍咁威》裡面扮《警訊》主持嗰個核突樣,呢個形象,同「名捕」兩字根本沾不上邊。家陣叫佢飾演追命,性格唔夾形象又唔Match,仲要化個殭屍妝加孖膶腸,塊面紙咁白又偏偏留二撇雞,一副守候皇帝兩邊唯唯諾諾太監Look,真係好想問陳嘉上係咪食咗Fing頭,大佬,你究竟點選角架?

《四大名捕》宣傳海報,唔Sell主角大頭,反而更型。

鄧超飾演冷血,佢識我我唔識佢,不過造型尚算OK。

 

黃秋生飾演諸葛正我,似模似樣。

劉亦菲飾演無情,又係要插,無情幾時變咗女人?

 

鄒兆龍飾演鐵手,最入型入格。