fbpx
PS Vita, PS3, PSP, Wii, Wii U, Xbox360, 主頁, 遊戲新聞 — 05/06/2012 at 5:17 pm

E3展前夠熱鬧 聽日開展見真章

by

每年E3最忙嘅日子都係開show前一日,事關除咗任天堂,所有公司都迫埋喺呢一日舉行發佈會,今年照舊由Xbox打頭陣,緊接住有EA、Ubisoft同SCEA。環顧今年發佈嘅消息同之前網上流傳嘅大致相同,驚喜唔算多,但係隻隻大作都有新公佈,仲有兩隻新作《Watch Dogs》同《Beyond》公佈,夠晒搶眼。

雖然任天堂記者會未開,但Ubisoft都搶閘公佈咗幾隻大作,除咗開場搵嚟一班靚女dancers跳舞示範Wii U都支援嘅《Just Dance 4》,另一隻現場公佈嘅《Zombie U》都值得注目,不過最深刻印象反而係新作《Watch Dogs》,作為壓軸出場遊戲,呢隻玩法有啲似GTA嘅遊戲概念創新,講未來世界人人都依賴網絡,玩家可以操控電路,透過截斷敵人電話通話以致干擾交通燈訊號以完成任務,難怪反應好熱烈。

至於SCEA記者會,門外照舊有唔同公司嘅食物車,比行足一日發佈會嘅記者醫肚,仲有酒水任飲。至於遊戲方面,最搶眼嘅係PS3幾款大作,其中包括《The Last of Us》同新公佈作品《Beyond》,兩款都由《潛行空間》女主角Ellen Page做人物角色藍圖,可惜Ellen Page本人無出席發佈會,否則會令發佈會更加精彩。

仲有幾個鐘就到今年主角任天堂記者會,任記今年都係揀喺E3開show前嘅上晝開發佈會,等大家聽完可以入會場摸摸看,發佈會有網上直播,可以喺以下網址睇倒:

http://e3.nintendo.com/

 

至於會場內外花絮同活動相片,梗係要繼續留意Gameover啦!