fbpx
主頁, 影音新聞, 電影 — 22/10/2013 at 4:08 pm

有片:恐怖《詭嬰》未驚過,林峯照Chok樣!

by

aaa

陰森大屋、無間怨咒、鬼娃娃、死亡之吻、血流遍地……港產鬼片《詭嬰》有齊大路恐怖元素,另加靚仔Chok樣。係,靚仔既為靚仔,就一定要Chok樣,那管拍嘅係恐怖片,林峯話嘅。

呢條Trailer都剪接得幾完整,短短分零鐘已經大致交代到《詭嬰》講乜,由鄰居(盧海鵬飾)作出警告開始:「呢間屋唔住得人架,你哋要搬呀。」搬入新屋嘅葉浩(林峯飾)同天睛(盛君飾)兩夫妻,已經注定墮入萬劫不復之地。天睛懷雙胞胎,未出世已經取名Jimmy同Adam,點知其中一個胎兒一出世就夭折,導致佢患產後抑鬱,竟然當上一手業主留低嘅洋娃娃係死去嘅兒子Jimmy。一輪轉折,葉浩發覺一切問題源自恐怖洋娃娃,追查後先知原來住得呢間屋嘅人都會懷雙胞胎,而其中一個胎兒又必然會死於怨咒。點樣解咒呢?唔知,我淨係知林峯實在太靚仔,明明拍嘅係恐怖片,但對住洋娃娃都依舊要Keep住個Chok樣,喂,家陣係恐怖片喎,整個驚恐表情望吓好喎,下下Chok,觀眾唔識驚架喎。(10月31日上映)