噚晚(1日)網上播嘅任天堂Direct，事先講明冇新機情報，不過，都有興奮嘢吖。就係「桃鉄」復活！《桃太郎電鉄2017》今冬將會喺3DS推出，有番咁上下機齡嘅應該好想玩呢隻經典作品嘅新作啦？另外，仲有《ピクミン》會喺2017年推出， Yoshi嘅《ポチと！ヨッシーウールワールド》就1月19日發售，WiiU都有Paper Mario《ペーパーマリオ カラースプラッシュ》喺10月13日發售，最後，仲有3DS都有得玩Super Mario Maker《スーパーマリオメーカー》。

原來《勇者鬥惡龍》嘅世界真係存在！日本網民放咗幾張相上Twitter，話原來德國Hemeln呢個小市鎮好靚，入面嘅居民會著晒中世紀嘅服裝，店舖又好有特色，走入去就好似去咗《勇者鬥惡龍》嘅世界。輯相好多網民RT，仲有人問係咪可以行埋去裝備道具，有機會去開德國記住去參觀吓嘞。

聽日6月21日就推出喇，有埋中文版，呢隻由《Rockman》之父「稲船敬二」開發嘅《Mighty No.9》，越睇越似樣，鍾意玩《Rockman》嘅應該可以搵番好多感覺。今次呢條發售前影片，見到打Boss，仲可以協力！見到主角被一嘢拮爆時嘅效果，一睇就搵得番《Rockman》嗰隻，不過波波變格仔咁解。留意番，3DS、PS Vita版發售日未定。

呢隻薩爾達遊戲，都應該係WiiU機主由出機等到收皮嘅一隻大作，亦都可能係WiiU最後一隻大作……下年會喺新主機NX同WiiU推出嘅《The Legend of Zelda: Breath of the Wild》，啱啱都有新片睇。林克今次識得爬山爬樹爬樓，仲識得斬樹變橋、生火放火燒雜草、荒山野嶺煮兩味，亦都有射蜂巢等蜜蜂攻擊敵人呢啲玩嘢元素，而且仲有盔甲可以換裝…..林克仲識得用高科技電子零件，解謎元素應該更豐富。但係喂，俾個日期嚟好喎。

嚟到5月，PS4機主基本上都會玩嘅有5月10日出嘅《Uncharted 4》，另外PS4/PS3/PS Vita《勇者鬥惡龍Heroes II》都緊接住推出，不過係日文版，中文版就仲未知幾時出。去到6月就有《討鬼伝 2》、《超級機器人大戰 OG The Moon Dwellers》同講咗好耐應該終於出得成嘅《Mighty No.9》，冷門少少仲有隻《Mirror’s Edge Catalyst》。最後係3DS嘅機主，6月都有幾多大作，《逆転裁判 6》、《牧場物語 3》、《太鼓の達人》輪住出。

打機都要講情懷，尤其小精靈班fans都變大個啦？呢隻已經推出嘅WiiU《ポッ拳》，喺呢個時候又再出廣告，「結婚式の二次会で『ポッ拳』が当たった男のはなし。」其實如果咁樣有囡囡入房對戰，都幾開心。

好消息係之前已經由2015年4月延至9月再延至今年春季嘅新一集Rockma……《Rockman》之父「稲船敬二」隻《Mighty No.9》，啱啱公佈發售日期喇！首先會係PS4/PS3/Xbox One/Xbox 360/Wii U五機種，6月21日配信！更好嘅消息係價錢亦都公開咗，就係2,500円。至於PS Vita/3DS版本就日期同價錢未定。咦，之前好似講過話有中文版，冇晒聲氣？不過呢類遊戲，都唔太需要啦。

今日係大掃除嘅日子，屋企嘅喵唔止無幫手，應該仲會搞破壞。新年換新屋，人梗係無可能啦，不過喵星人可能得，外國就有人整咗呢套喵星人層架獎勵主子，用瑪利奧做靈感，有磗有水管仲有好屈機嘅子彈，睇班喵星人似乎玩得好開心，條水管仲可以鑽入去。呢位貓奴之前仲整過巨人炸彈球慰勞主子，做佢嘅喵都幾幸福。

唉，以為2月就有得玩新一集《Rockm……我意思係《Rockman》之父「稲船敬二」隻《Mighty No.9》，點知嚟到發售日唔夠1個月嘅時候，壞消息又嚟。由最初2015年4月，之後2015年9月，再嚟今年2月……最新消息係「稲船敬二」發佈俾各backers嘅，話因為由於online mode出咗問題，要延至今年春天推出。

其實都唔駛講，喺WiiU度就一定係畫面最靚，不過唔係人人都有買WiiU，又或者想拎出街玩，所以《ゼルダ無双 ハイラルオールスターズ》出喺3DS都好嘅，多啲人玩到嘛。咁喺舊機同新版3DS玩分別大唔大？入嚟有齊三機比較影片睇。

2016年，新一年開始，係時候計劃定今年嘅打機行程表嘞！嚟到1、2月，好多勁game陸續推出，最期待嘅有《進撃の巨人》、《人中之龍 極》同《火影忍者 疾風傳：終極風暴 4》，夠玩晒兩個月，但係有囡囡陪打沙灘排球嘅《DEAD OR ALIVE Xtreme 3 Fortune》同新一集《Street Fighter V》又好吸引‥‥‥仲有等咗好耐，希望唔好再延期嘅PS Vita《艦これ 改》同《Mighty No.9》。話時話，嚟緊兩個月PS Vita都幾多正Game，有興趣出機嘅可以諗諗。

呢隻遊戲，雖然喺日本推出街機時反應麻麻，但有Wii U嘅都係任記fans，亦都極有可能係《寵物小精靈Pokémon》fans啦？咁3月18日有Game買嚟玩喇。《ポッ拳　POKKÉN TOURNAMENT》Wii U版嘅最新預告片出咗，亮點係初回特典，仲有，HORI會推出當時街機有嘅手掣「『ポッ拳』専用コントローラー for Wii U」，3480円。

希望真係唔好再延期喇。之前公佈咗美版2月9日、日版2月12日發售(PC/PS4/PS3/XboxOne/Xbox360/WiiU/PSVita/3DS/Mac版)，仲講咗話會有中文版，不過唔知係咪同步。好喇《Rockman》有Zero，由《Rockman》之父「稲船敬二」comcept開發嘅《Mighty No. 9》都應該要有位類似角色？呢隻Ray就係喇，不過睇落個樣，其實我覺得好似「世界最後之日」隻三一……

由Jeremy Scott操刀嘅時裝品牌Moschino一向鐘意玩嘢，之前出過McDonald’s系列，又玩過海棉寶寶，最近趁Super Mario Bros嘅30週年，決定同任天堂合作，殺入遊戲界。佢哋合作設計咗呢個「Super Moschino」系列，有Tee、衞衣、背囊、手袋、皮帶、銀包、高踭鞋等產品，講真嗰幾件tee設計麻麻，用靚女著都補救唔到，反而用星星、金幣、蘑菇設計嘅幾款monogram手袋就幾得意，可惜今次嘅合作似乎只得女士啱買，一班由細打Mario打到大嘅男玩家今次可以慳返。

今年係Super Mario嘅30週年，做得fans預咗要駛錢，不過點諗到要駛成10幾萬港紙？瑞士名錶品牌Romain Jerome最近宣佈推出Super Mario bors. 30週年限定版手錶，用咗46毫米直徑嘅鈦金黑錶盤，錶面有8bit風格嘅瑪利奧大叔，仲有一堆草、一嚿雲同一粒蘑菇，全球限量85隻，不過開價要$18,950美金，即係港紙超過14萬，夠買架日本車！其實今次都唔係JR第一次出限量版遊戲主題嘅錶，之前都出過《Space Invaders》同《Pac-Man》，都係開價萬萬聲(美金)，入嚟有回帶。