主頁, 人物專訪, 專題熱話 — 01/05/2012 at 1:20 pm

人物專訪:香港槍Game一姐 日頭教琴 夜晚殺人

by

徇眾要求,Kali坐到琴前,纖幼靈巧的手指放在琴鍵上,彈指間奏出動人蕭邦樂曲,奏完一曲,我仍陶醉其中,呷一口花茶說:「阿一姐,不如開機……」「唔好叫我一姐!叫老晒!」怒目一瞪,突然槍林彈雨,殺氣彌漫,拿著手掣的她連轟幾槍再 補個Grenade……

我相信如果我這一刻嗌多句「一姐」,係會換來一記head shot爆頭的痛快了斷……係,誇張了太多,Kali真 人其實好nice,冇分裂,只不過係日頭對住小朋友教琴,夜晚同班麻甩仔連線互轟的機迷,靚女機迷。

「我記得嗰陣我打《Lost Planet》,攞到全港第一最高分。之前打機我一路冇用handsfree,佢哋唔知我係女仔,到我一出聲,啲人當堂嚇一跳,然後就叫我一姐。所以,唔好叫我一姐喇,叫我Kali啦。」在香港,鍾情射擊遊戲的女機迷很少,玩得好的更少,加上靚女外形,所以Kali常被兩大陣營遊戲公司邀請擔當活動嘉賓,近月有Xbox360的《Star War Kinect》,PS陣營的《Ghost Recon: Future Soldier》、《Resistance: Burning Sky》、《StarHawk》試game日,既可試game,又可當model,著數。打機打到出event,還替電腦雜誌撰寫打機及周邊產品專欄,今日筆者來到Kali家中訪問,就是想看看她的打機陣營。

茶几上有剛沖好的花茶,「係呀,尤其冬天,我最鍾意沖壼暖笠笠花茶,再坐喺梳化度打通宵機。」還有一本筆記薄,「我啱啱幫雜誌寫呢隻遊戲攻略,一邊打一邊寫,噚晚先寫通宵。」也看到Keyboard及Mouse,「唔係,我唔用keyboard打機,我覺得手掣就手啲。」望向客廳另一邊,有大型混音設備、一座電子琴、還有大量古典音樂黑膠、CD,「我好細個就開始學琴,可能因為咁都鍾意聽古典音樂,香港嘅流行曲就真係比較少聽。所以,都唔會去唱K。」這種與別不同,裝不出來。

第一身、第三身射擊遊戲,不少男機迷都玩到頭暈暈,但Kali卻走位快伏位準,「其實都冇乜秘訣……」講啦,「可能係我彈慣琴睇慣譜,手、眼協調得比較好。」Kali一手鋼琴達演奏級,硬要找理由,讓我等手下敗將好過一點點,就是這個了!還有還有,Kali每日教琴數小時,晚晚可以打機打通頂,我朝九晚六仲要應酬老細,梗係唔夠佢打啦……唓!原來係咁,我舒服番晒,有番自信喇!「咁我的確係成日忍唔住打機打天光。」黑眼圈呢?你個黑眼圈呢?

打機大男人,敗在女機迷手底下,我會慢慢放低手掣,淡淡然拋低一句:「我唔同你玩喇!」然後offline自己狂操,發奮圖強。但並唔係個個機迷都懂得何謂男人浪漫。「香港男仔最好,好少會鬧人,講明有女仔喺度都唔會講粗口。外國人就成日都打心理戰,未開打就鬧定你先,我哋多數都唔出聲,等贏咗佢哋,再寸佢一句先走!不過有啲都好好嘅,見到有女仔打,仲會撩吓我傾計。」實戰觀察,Kali喺打機時絕對唔會唔出聲:「Online打機都好講合作,所以我都成日都出聲,會大家互提補位。最怕就係遇到啲成日出嚟攞著數嘅,即係人哋就快射爆佢就埋嚟補兩槍嗰隻,仲有,其實我有少少怕人打得太渣,因為我
唔想輸!唔好連累我,哈哈!」想睇打機實況,記得睇片!

「除咗射擊game之外,其他game我都玩,好似塊魂嗰啲。」卻絕對不是拿著3DS篤篤篤的軟性玩家,「仲有動作game嗰啲都會玩,不過街霸鐵拳嗰啲就打得唔叻。」正期待著《Diablo III》的Kali說:「上一代都有玩呀,今次隔咁耐再出新一代,梗係要玩啦。」仲有睇漫畫,「我都有睇漫畫,例如《Gantz》。」《Gantz》都有睇,認真識貨,絕對係動漫機迷嘅女友典範呀!

講到機齡,「細個時我細佬打PS隻《Biohazard》嗰陣,我都有玩呀。我諗係嗰陣開始打機啦,之後電腦online game,樣樣都有打吓。我o依家屋企都仲有部PS喺度,仲有太鼓之達人套鼓,哈哈!打《Biohard》嗰陣幾歲?咦?哦!你想計我o依家幾多歲,我唔會講嘅!」果然,作為一個軍人,除咗要夠勇夠狠,仲要有精明頭腦呀!

後記
作為男性記者,當然抱住事事關心的求真精神,我決定為民請命,「揀男友使唔使打機叻過自己?」「最好啦,打得叻過我,一齊打時我同佢都會開心啲啩?」

Kali彈琴足本影片:

 

Tags