主頁, 人物專訪, 動漫資訊, 專題熱話 — 05/04/2012 at 1:32 am

邱福龍 鐵將縱橫 草稿賣斷市

by

《鐵將縱橫》出到第五期都冇脫期,不過賣唔過八成,龍少剃唔成頭。

見到新版《鐵將縱橫》畫到第五期啲畫都仲咁靚,每星期十四蚊(就算遲啲十五蚊),我絕對願意。不過同時,對於又係武俠打鬥題材……「啱啱出嚟自己搞公司,自負盈虧,穩陣啲嘛。其實我仲構思咗個機械人題材故事,畫完《鐵將縱橫》我一定會畫。」據龍少所講,《鐵將》預計起碼畫一年,好,其實齋睇勁有心機嘅周記,都值得我撐多你一年!

httpvh://youtu.be/aqys9t_dLbw

 

武打鉫鎖

富樫義博能以《Hunter X Hunter》草稿於《少年Jump》連載,好勁?香港有個邱福龍直情出埋草稿版創刊號賣$46都有人捧場,創刊草稿印二千五書賣晒,威唔威先?訪問係喺《鐵將縱橫》創刊前幾天做,講到許下剃頭諾言,賣得過八乘,剃頭冇所謂啦?龍少有少少激動:「咩冇所謂?剃頭喎!好肉酸!點賭馬?」最後,頭剃唔成,銷量六成八,一萬九千五百書,對於呢個龍少口中穩陣啲嘅題材嚟講,唉。銷量同口碑在如此市道,其實相當唔差,唔駛唉聲嘆氣咁嚴重啩?令人悲哀嘅係如此一本高質素漫畫(只論畫功,故事未知),也未能賣過二萬書!「o依家實在係港漫嘅黑暗期,所以我將公司名改做『DARK』,希望可以走出黑暗重見光明。」打稿前揭緊第五期,畫功依然極品級,「嗰陣一個人要顧幾本書,畫幾期,又要開始第二本,唔係唔想做,係做唔嚟!」雖然未能擺脫港漫打鬥題材鉫鎖,但起碼冇重蹈代筆嘅覆轍,對港漫、龍少有愛嘅,都值得慶賀。

兩包紅萬

港漫迷,愛之深。其實港漫黑暗期,應該源自故事單薄又單調。有好劇本,睇畫功之餘睇埋故事會更開心,例如之前改篇自九把刀嘅《第八銅人》、《功夫》。「家要傾九把刀版權,太貴!《龍神》一樣,又係要俾幾邊版權……」《第八銅人外傳》之後,龍少喺福龍動漫最後一本作品係《刺皇》,原創劇本,因為銷量差而提早埋尾,於是,諗完又諗,生出自創公司諗頭,自己話事!「講明先,我同黃生冇不歡而散。」係,我仲見到你本書都有《天子8》廣告。

訪問期間,龍少完全投入狂畫,「真係停唔到手,一日畫十二粒鐘。」唔使講龍少畫畫時有幾投入,剩係睇畫面構圖撚到盡,就知佢呢舖摶到盡,「衰咗係要賣樓呀,好出奇呀?」眼見馬sir炒樓炒到億億聲,再比較吓兩個手畫,係幾出奇呀!「咁佢係叻仔嘅。」不過講到畫功,龍少自信好快返埋嚟:「以我呢門手藝,剩係生活到,會唔會太悲哀呀?」為咗可以用搵食技能提升生活至「生活以上」,訪問期間龍少極少正眼望我,只係邊答邊埋頭狂畫冇停手,頂籠點支「紅萬」食兩啖,「一日兩包,不過燒咗一半,一開始投入咗就停唔到手,好集中。」至少嚟到第五期,都未有脫期,「要求高係以前脫期嘅原因,咩都攬上身自己做。家都要求高,唯有畫快手啲!」有老婆有個女,梗要摶到盡,48歲男人,除咗煙霧彌漫之外,我睇到佢仲有火呀!

 

後記

唔好講咩中年危機港漫黑暗期喇,不如輕鬆啲。家仲有冇咩興趣?「砌模型。」咁忙仲砌?「都要輕鬆吓!一味做會死!」仲要陪屋企人呢,「仲有睇戲,睇戲有時都攞到靈感。」難怪分鏡充滿電影感。「我咩戲都會睇,我都幾鍾意彭浩翔啲戲,佢啲戲好差唔多睇晒。」《買兇拍人》?「呢套麻麻。」《春嬌與志明》?「呢套都應該會睇。」冇錯喇,追上潮流好重要。我會繼續買《鐵將縱橫》,但更期待自立門戶之後嘅其他作品,你自己都鍾意睇《異形》同《變型金鋼》啦!

最後,記得睇埋段片,就知龍少手畫有幾快幾勁。「家拍我畫畫呀?畫得咁肉酸,啱啱開工未開筆呀!」唔係啩?下下都霹靂雷霆震霪霧呀?

 

(親筆簽名板當然要嚟送禮,稍後會公佈詳情,請留意。)

助理「行床」嘅傳統依然,呢間房,龍少話係用嚟行床嘅。

 

 

 

本週人氣

10696 views

日本怕凍貓坐太近暖爐 貓鬚鬈晒好可憐

8110 views

本名再現!25歲三上悠亜出圖回憶成人式

7779 views

睇咗未?36歲深田恭子新日劇開播 網民截圖話好可愛

6258 views

【有片】全100期《Gundam MS Bible》 每期一機體超詳盡介紹

5663 views

今個月有得扭 扭蛋球狀變高達頭