主頁, 動漫資訊, 潮玩新聞 — 19/10/2012 at 1:36 pm

《脫北者》完結,讀後有感!

by

《脫北者》第三期$15

《脫北者》出到第三期正式完結,我問幫趁開嘅書報攤老闆娘銷情如何,佢只淡淡然答咗我兩個字:「麻麻。」唔,麻麻,都係啦,總好過答差,期望鄭健和唔好嫌銷量麻麻,而唔推出呢類令讀者有反思空間嘅港漫。

畢竟只係一本虛構嘅漫畫,並唔係甚麼有根有據嘅歷史或真人真事,睇完三期書,你話心頭好沉重咩?又未至於,但有多少唔舒服就梗架嘞。故事唔玩大團圓結局,改玩Open ending,中咗槍嘅小源仲有無命捱到去自由國度?鐵釘又有無俾洪峰監生打死?兩個相識咗唔夠一日嘅朋友仔,又有無重逢嘅一日呢?留番俾讀者自己幻想。埋單計算,今期令我心頭有多少唔舒服嘅情節有三,一,小源被國民前鋒隊小頭目雷欣死纏爛打,忍無可忍,一拳怒轟呢個俾政府洗腦嘅小女孩,呢一拳,好有依家中國官逼民反嘅況味,唔講遠,就講擒日,四川瀘州發生民眾騷亂,民眾不滿警員涉嫌打死一個貨車司機,成千人圍住警員怒罵狂毆,仲推翻同焚燒警車洩憤,狗官當道,不得不反。二,洪峰當眾打死鐵釘,為官者視法律為無物,濫用私刑,簡直係上年汕尾市烏坎事件嘅漫畫版,喺現實世界裡面,烏坎村村民因土地被人無理變賣,經多次上訪無效,逼不得已示威,武警鎮壓,拘留村民薛錦波並狂毆,三日後薛錦波死亡,警察再唔係維持治安嘅人民英雄,而係視人命如草芥嘅殺人狂魔。三,雷欣中槍奄奄一息,旁人各家自掃門前雪,有人貪得意睇雷欣點死,有人急急腳離開現場,有人繼續講生意經,完全唔理雷欣死活……唉,大家仲記得小悅悅事件嘛?兩歲小童悅悅被貨車司機撞倒,司機不顧而去已經夠人渣,目睹案發經過而見死不救嘅十八個途人,就簡直泯絕人性,最後只得拾荒婆婆肯出手相救,但因延誤施救,悅悅慘成植物人。

睇完《脫北者》,我聯想起幕幕悲慘嘅中國世情,你呢?

官逼民反,小源怒打雷欣

雷欣奄奄一息,途人冷眼旁觀。

洪峰泯滅人性,當眾毆打鐵釘。

小源能否有命捱到自由國度?

 

 

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>